نقترب على العام منذ تولى الاخوان مقاليد حكم مصر العظيمة فاذا كان شعب مصر العظيم راضياً عن حاله وحال بلده فلا يسعنى الا ان اقول له
” البس واشرب ياشعب ”
الحوار السرى المدبر الذى شاهدناه ورأيناه جميعاً علي قناة الأطفال (سبيس تون ) والذي كان يناقش عواقب سد النهضة الأثيوبي لا يسعني الا أن أقول لكافة المتحدثين أرجوكم لا تتحدثوا عن سد النهضة وتحدثوا عن سد الحنك .
تصريح الشئون النيابية والتظبيطية المستشار السابق حاتم بجاتو ومقولته “بيضاء” وهو يقصد صحيفة الحالة الجنائية للرئيس مرسي حين تقدم بأوراق ترشحه لبجاتو لا يسعني الا أن أصحح له وأقول يا راجل دا دخل السجن مرتين , إزاي بيضاء .. أكيد حمرا .
المبدع أيمن نور الخارج عن أي تصنيف والذي نجح بجدارة في مصالحة خيرت الشاطر حسن علي الدبلوماسي عمرو موسي , طيب كمل جميلك يا أبو نية صافية واعزمني علي العشاء عندك وتجيب العامري فاروق وتصالحنا , بس اوعي تفضحنا أحسن أخاصمك …. وبالمناسبة حلو جداً اقتراحك السري بتاع نشتري طيارات ورق وشماريخ ونهوش وما نضربش بجد , ولا يسعني الا أن أتقمص دور كركر .. هو دا كلامك !
حين نصح محمد أنور السادات الرئيس مرسي بتظبيط قبائل اثيوبيا وأكمل عبقرية حديثه ” ما انت عارف يا ريس ان أفريقيا كلها بتتظبط ” , ولا يسعني الا أن أقول له أنه علي حسب كلامك وبما أن مصر في أفريقيا فنحن جميعا بنتظبط وطبعا انت معانا .
حملة ملط .. أقصد تجرد .. ادعت أنها جمعت 6 ملايين توقيع , ويبقي السؤال : اللي وقع ده .. وقع علي ايه ؟ علي رضائه عن الحالة الأمنية أم رضائه علي الكهرباء التي باتت منحة , أم النيل الذي قد يتحول الي ذكري ام الدولار الذي نجري وراءه أم الجاز الذي لا نجده كي نشعل النار في أنفسنا أم الأسعار اللي بتجيب سعار ولا الانقسام والفتنة اللي فرقتنا , ولا سيناء اللي راحت تاني لينا , ولا الكآبة اللي في كل بيت مصري ولا شباب الثورة الذين تحولوا الي ميت أو مصاب أو مسجون أو هيتسجن .. لا يسعني الا أن أقول لكم علشان نصدق كدبكم ما تقولش 6 ملايين اكتفي فقط برقم 6 واحنا هنحاول نصدق !! .
بعد محاولة حرق مقر حملة تمرد , ومحاولة الاعتداء علي شبابها , لا يسعني الا أن أنصح النائب العام بتحميل الشقى احمد دومه المسئولية الجنائية قبل ان يخرج من السجن ، وبالمناسبة اخبار خاطفى الجنود المصريين ايه ؟! ، ولماذا لم يتم القبض عليهم ، واذا كنتم حبستم دومه فى السريع البنى كده بتهمة اهانة موظف عام بدرجة رئيس جمهورية ، طيب واللى اهانوا مصر بالكامل وخطفوا خير اجناد الارض وعذبوهم متى يتم القبض عليهم ؟! ، ام كفايه علينا دومه ونواره نجم .. الله عليكم وعلى هيبة الدورة وعلى هيبتكم السودا ! .
نصيحة اقدمها لاى جندى مصرى عايز يتخطف ويرجعله حقه ، لما تحب تتخطف .. تخطف من المقطم جمب مبنى الارشاد وصدقنى فى ظرف 38 ساعة هيقبضوا على الخاطفين وعليكم برضه .
وفى النهاية احب ان اكرر اذا لم تنزل من بيتك فى 30 يونيو الجارى 2013 وفتحت التلفزيون علشان تتفرج احنا هنعمل ايه .. فالبس اذا لقيت حاجه تلبسها .. واشرب ده اذا لقيت النيل !! .